https://innews.media/uploads/news/2024-10/_innews_734bbe942a6e480b0325754a3_o.jpg
Regionda ilk dəfə ölkəmizdə keçirilən 30-dan çox ölkədən 120-yə yaxın nümayəndə, o cümlədən rəsmi şəxslər, diplomatlar və nüfuzlu ekspertlərin iştirak etdiyi Kiberdiplomatiya üzrə Beynəlxalq Konfransda “Bakı Bəyannaməsi” qəbul edilib.
BAKI BƏYANNAMƏSİ
25 sentyabr 2024-cü il
Biz, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti və Rumıniyanın İnformatika üzrə Milli Tədqiqat və İnkişaf İnstitutunun Kiberdiplomatiya Mərkəzinin dəvəti ilə 25 sentyabr 2024-cü il tarixində Bakıda keçirilən Kiberdiplomatiya üzrə Beynəlxalq Konfransın (ICCD) iştirakçıları:
Rəqəmsal dövrün həm misli görünməmiş imkanlar, həm də mürəkkəb çağırışlar yaradaraq cəmiyyətləri qlobal şəkildə dəyişdirdiyini qəbul edərək;
Güclü qlobal kiberekosistemə töhfə verən insan mərkəzli, inklüziv və inkişaf yönümlü informasiya cəmiyyətini qiymətləndirərək;
Beynəlxalq dialoq və əməkdaşlığın kibertəhdidlərin aradan qaldırılması və açıq, təhlükəsiz, sabit, əlçatan və dinc kiberməkanın təşviqində mühüm rol oynadığını dərk edərək;
Beynəlxalq hüququn norma və prinsipləri, xüsusən də Birləşmiş Millətlər Təşkilatının Nizamnaməsi və kiberməkanda məsuliyyətli dövlət davranışı normalarını rəhbər tutaraq;
Beynəlxalq əməkdaşlığın inkişafı, etimadın artırılması və sərhədlərarası kiberproblemlərin effektiv həllində kiberdiplomatiyanın əhəmiyyətini vurğulayaraq;
Qadınların kibertəhlükəsizlik təşəbbüslərində iştirakını təşviq etmək yolu ilə hamı üçün daha təhlükəsiz onlayn mühiti təmin etmək məqsədilə onlayn qısnama və kibertəqib kimi gender əsaslı kibertəhlükələrin aradan qaldırılmasına çağırış edərək;
Qlobal səviyyədə ətraf mühit məsələlərinin rəqəmsal siyasət və təcrübənin bütün aspektlərində ehtiva olunduğunu təmin etmək üçün informasiya texnologiyalarının qidalandırılmasında yaşıl enerji mənbələrindən istifadəyə ehtiyac olduğunu vurğulayaraq;
Qlobal rəqəmsal infrastrukturu və iqtisadi sabitliyi təhdid edən kiberhücumlar, məlumatların pozulması və digər zərərli fəaliyyətlərlə bağlı artan insidentlərdən narahatlıq ifadə edərək;
Kiberməkanda məsuliyyətli davranışın, o cümlədən kiberinsidentlərlə bağlı məlumat verilməsində şəffaflıq və insidentlərə cavab verilməsində əməkdaşlığın zəruriliyini təsdiq edərək;
bəyan edirik:
Beynəlxalq hüquq və məsuliyyətli dövlət davranışı normalarını rəhbər tutaraq açıq, təhlükəsiz, sabit, əlçatan və dinc kiberməkana sadiqliyimizi bir daha təsdiq edirik;
Kibertəhdidləri aradan qaldırmaq və azaltmaq üçün təkmil qlobal əməkdaşlığın və məlumat mübadiləsinin vacibliyini vurğulayırıq;
Kiberməkanda məsuliyyətli dövlət davranışı üzrə əlavə normaların zamanla hazırlana biləcəyini qəbul edirik;
Təhlükəsiz və açıq rəqəmsal mühiti təmin edən kiberdavranış və kiberidarəetmə üzrə beynəlxalq standartlar və normaların işlənib hazırlanmasını dəstəkləyirik;
Rəqəmsal hüquqların təşviqi və hərtərəfli hüquqi və siyasi çərçivələr vasitəsilə kritik rəqəmsal infrastrukturun mühafizəsinə çağırırıq;
Kollektiv kibertəhlükəsizlik səylərini təşviq etmək üçün hökumətlər, özəl sektor və vətəndaş cəmiyyəti arasında dialoqu və əməkdaşlığı inkişaf etdirməyə bağlılığımızı ifadə edirik;
Birləşmiş Millətlər Təşkilatının Kibercinayətkarlığa qarşı Konvensiyası layihəsi üzrə razılığı alqışlayır və bu ilin sonunda onun qəbul olunacağına ümid edirik;
Qlobal Rəqəmsal Sazişin qəbulunu alqışlayır və onun ehtiva etdiyi öhdəlikləri yerinə yetirməyə çağırırıq;
ICCD və digər beynəlxalq platformaların kiberdiplomatiya üzrə əməkdaşlığın inkişafında mühüm rolunu qəbul edirik;
Kiberdiplomatiya üzrə Bakı Bəyannaməsinin qəbul edilməsinə görə Azərbaycanın təşəbbüsünü yüksək qiymətləndiririk;
Səmimi qonaqpərvərliyə görə Azərbaycan Respublikasının xalqına və hökumətinə minnətdarlığımızı bildiririk.
Kiberdiplomatiya üzrə Beynəlxalq Konfrans - BAKI BƏYANNAMƏSİ
International Conference on Cyber Diplomacy - BAKU DECLARATION
