https://innews.media/uploads/news/2025-12/_innews_5edcb216b599f99b66cd0c61c_o.jpg
25 noyabr tarixində Avropanın aparıcı mobillik platforması Bolt və süni intellekt əsaslı avtonom nəqliyyat texnologiyaları istehsalçısı olan Çinli Pony Aİ İnc., Avropada avtonom mobilliyin tətbiqini sürətləndirmək üçün tərəfdaşlıq etdiklərini elan ediblər.
Bu tərəfdaşlıq “Pony.AI”-ın qabaqcıl 4-cü səviyyə (Level 4) avtonom idarəetmə texnologiyasını Bolt-un geniş ekosisteminə inteqrasiya edəcək. Əməkdaşlıq ilkin mərhələdə real şəraitdə testlərə, təhlükəsizlik üzrə qiymətləndirməyə və tam avtonom, sürücüsüz nəqliyyat imkanlarını təmin etmək üçün istifadəçi təcrübəsinin hazırlanmasına fokuslanacaq. İlkin tətbiq şəhərləri həm Avropa Birliyinə üzv olan dövlətlər, həm də üzv olmayan ölkələr arasından seçiləcək.
Tərəfdaşlıq “Pony.AI”-ın Avropadakı mövqeyini daha da gücləndirməsi gözlənilir, xüsusilə də Bolt-un tənzimləmə sahəsindəki təcrübəsi və qitə üzrə geniş əməliyyat şəbəkəsi sayəsində. 2013-cü ildə Estoniyada qurulan Bolt hazırda 50-dən çox ölkədə və 600 şəhərdə fəaliyyət göstərir və 200 milyonadək istifadəçiyə müxtəlif paylaşım əsaslı mobillik xidmətləri təqdim edir.
Pony.ai-nin təsisçisi və baş direktoru Dr. Ceyms Penq bildirib:
“Bolt ilə tərəfdaşlıq qlobal genişlənməmizdə mühüm addımdır. Pony.ai-nin avtonom nəqliyyat texnologiyasını Bolt-un Avropa mobilliyi üzrə dərin bilikləri ilə birləşdirərək, təhlükəsiz və etibarlı robotaksi texnologiyasının tətbiqini sürətləndirə bilərik. Avropa avtonom nəqliyyat üçün sürətlə inkişaf edən və böyük potensiala malik bazardır və biz hesab edirik ki, bu əməkdaşlıq gələcək böyümə üçün güclü baza yaradacaq. Birgə yeni dəyər yaratmağı səbirsizliklə gözləyirik.”
Bolt-un təsisçisi və baş direktoru Markus Villiq isə qeyd edib:
“Avtonom nəqliyyat vasitələri insanların və yüklərin hərəkət tərzini dəyişəcək və Bolt, Pony.ai ilə əməkdaşlıq edərək bu texnologiyanın miqyaslanmasına dəstək verməkdən qürur duyur. Qlobal miqyasda rəqabət aparan yeganə müstəqil, Avropa mənşəli taksi sifarişi platforması kimi Bolt, avtonom nəqliyyat texnologiyalarının Avropanın təhlükəsizlik və məlumat standartlarına tam uyğun şəkildə məsuliyyətli və effektiv tətbiqini təmin etmək üçün unikal mövqeyə malikdir.”
“Avtonom mobillik hər yerdə” vizionu ilə Pony.ai robotaksi texnologiyasının inkişafı və kommersiyalaşdırılmasını qlobal miqyasda irəli aparır. Şirkət tərəfdaşlıqlar vasitəsilə səkkiz ölkədə fəaliyyət dairəsini genişləndirib və dünya üzrə açıq yollarda 55 milyon kilometrdən çox avtonom test və əməliyyat məsafəsi qət edib.
Pony.ai haqqında
Pony AI Inc. (“Pony.AI”) avtonom mobilliyin geniş miqyasda kommersiyalaşdırılması sahəsində qlobal liderdir. Şirkət nəqliyyat vasitəsindən asılı olmayan “Virtual Driver” texnologiyasından – özünəməxsus proqram təminatı, avadanlıq və xidmətləri bir sistemdə birləşdirən tam yığın avtonom idarəetmə platformasından – istifadə edir və müxtəlif nəqliyyat sahələrində kütləvi istehsal və geniş tətbiqi mümkün edən davamlı biznes modeli qurur.
2016-cı ildə təsis edilən Pony.AI hazırda Çinin birinci səviyyəli dörd şəhərində (Pekin, Quanqcou, Şanxay, Şençjen) tam sürücüsüz robotaksi xidmətini kommersiya əsasında həyata keçirən yeganə şirkətdir. Pony.ai 720 robotaksi və təxminən 200 robotruckdan ibarət avtoparka malikdir. Bu günə qədər şirkət dünya üzrə açıq yollarda 55 milyon kilometrdən çox avtonom test və əməliyyat məsafəsi qət edib.
