https://innews.media/uploads/news/2023-06/_innews_c7218cfe2fe65c85800116d96_o.jpg
İyunun 13-də ADA Universitetində “Məzun günü” keçirilib. Tədbirdə tələbələrlə yanaşı onların ailə üzvləri, professor-müəllim və işçi heyəti, eləcə də dövlət və özəl qurumları təmsil edən qonaqlar iştirak ediblər.
Tədbir Universitetdə təhsil alan əcnəbi tələbələr tərəfindən təmsil edilən ölkələrin bayraqlarının səhnəyə gətirilməsi və Azərbaycan Respublikasının Dövlət Himninin səsləndirilməsi ilə başlayıb.
Daha sonra, tədbirin aparıcıları Mənzər Əmirli və Qədir Səfərli builki bakalavr məzunları adından çıxış etmələri üçün İnci Rüstəmovanı və Fatimə Davudlunu, magistr məzunlarını təmsil etməsi üçün isə Murad Malik Aslanovu səhnəyə dəvət ediblər.
ADA təhsili sayəsində əldə etdikləri nailiyyətlərdən bəhs edən və yenicə məzun olmağa hazırlaşan çıxışçılar buradakı təhsil dövrü ərzndə yaşadıqları ən unudulmaz anları yada salıblar. Məzunlar onların akademik, şəxsi və peşəkar inkişafında əvəzsiz rolu olan ADA Universitetinin müəllimlərinə minnətdarlıqlarını ifadə ediblər.
Tədbirdə çıxış edən ADA Universitetinin akademik işlər üzrə prorektoru Vəfa Kazdal tələbələrin, məzunların və müəllim heyətinin uğurlarına toxunub.
“Hansı ildə məzun olmanıza baxmayaraq və harada olmanızdan asılı olmayaraq, sizin daim ADA dəyərlərinin daşıyıcısı olacağınıza və burada aşılanan layiqli vətəndaş prinsiplərinə hər zaman sadiq qalacağınıza əminəm”, - deyə ifadə edəb Vəfa Kazdal onlara gələcək fəaliyyətlərində uğurlara imza atmağı və öz əməlləri ilə digərlərini ilhamlandırmağı arzu edib.
Məzunlar qarşısında çıxış edən Azərbaycan Respublikası Mərkəzi Bankının sədri Taleh Kazımov Məzun gününü yeniliklərin başlanğıcı kimi qiymətləndirib.
“Sürətlə dəyişən hazırkı dövrdə ən böyük dəyərinizi—öz bilik və bacarığınızı böyük təsirə malik işlərə görməyə sərf edin”, - söyləyən Sədr məzunları arzularını, məqsədlərini düzgün müəyyənləşdirməyə, cəmiyyətə faydalı işlər görməyə səsləyib.
Tədbirdə ADA Universitetinin rektoru, səfir Hafiz Paşayev çıxış edərək məzunlara peşəkar həyatlarında uğur qazandıracaq dəyərli tövsiyələr verib. ADA-nın vaxtilə, 2011-ci ildə cəmi 16 məzunun iştirakı ilə Məzun günü keçirdiyini, lakin bu gün məzunların sayının dəfələrlə çox olduğunu, hətta həmin məzunlar arasında Vətən Müharibəsi iştirakçısının da olduğunu bildirib.
“Universitetin missiyası yalnız təhsil vermək deyil, onun missiyası həm də sosial məsuliyyətə malik vətəndaşlar yetişdirməkdir” deyən Rektor ADA Universitetinin hazırkı layihələrindən bəhs edib. Əlavə olaraq səfir Hafiz Paşayev İtaliya-Azərbaycan Universiteti çərçivəsində təqdim edilən iki yeni fakültədən, eləcə də ADA Universitetinin regionda fəaliyyət göstərənlər üçün təqdim etdiyi azərbaycandilli magistr ixtisaslarından söhbət açıb.
Çıxışlar başa çatdıqdan sonra ADA Universitetinin Tələbə qəbulu və Qeydiyyat şöbəsinin direktoru Günay Ziyadova səhnəyə dəvət edilib və bununla da diplomların təltifetmə mərasimi elan edilib.
Diplomlar ixtisaslar üzrə müvafiq olaraq İctimai və beynəlxalq münasibətlər fakültəsinin dekanı Anar Vəliyev, Biznes fakültəsinin dekanı Hüseyn İsmayılov, İnformasiya Texnologiyaları və Mühəndislik fakültəsinin dekanı Abzatdin Adamov, Təhsil fakültəsinin dekanı Ülviyyə Mikayılova və Hüquq fakültəsinin dekanı Rəşad İbadov tərəfindən təqdim edilib.
Qeyd edək ki, tədbirin qonaqları qismində Vəkillər Kollegiyasının sədri Anar Bağırov, Əmək və Əhalinin Sosial Müdafiəsi nazirinin müşaviri Anar Kərimov, Xarici işlər nazirinin müavini Elnur Məmmədov, Dövlət İmtahan Mərkəzinin Direktorlar Şurasının sədri Məleykə Abbaszadə, “Azərxalça” ASC İdarə Heyətinin sədri Emin Məmmədov və digər dövlət qurumlarından səlahiyyətli şəxslər iştirak edib.
Rektor Hafiz Paşayevin ADA Universitetininin 2023-cü il məzunlarını elan etməsindən sonra tədbirin rəsmi hissəsi başa çatıb və bədii proqrama keçid edilib. Məzunlar klassik və müasir musiqilərin fonunda əyləncəli anlar keçiriblər.
Xatırladaq ki, ümumilikdə 2022-2023-cü akademik il üzrə ADA Universitetində 8 bakalavr və 8 magistr ixtisası üzrə 571 tələbə məzun olub. Məzun olan tələbələrin 548-i yerli, 23-ü isə əcnəbidir.
Bu ilki tədbirdə məzun olan əcnəbi tələbələr 14 müxtəlif ölkəni təmsil ediblər. Həmin ölkələr arasında Belarus, Gürcüstan, İndoneziya, İran, Meksika, Moldova, Mozambik, Özbəkistan, Qazaxıstan, Rusiya Federasiyası, Seyşel Adaları, Sudan, Tacikistan, Ukrayna yer tutur.
Ən son xəbərləri səhifəmizdən də izləyin
