Dövlət Uşaq Filarmoniyası "Sizin üçün" adlı konsert proqramı ilə çıxış edib

3 mart 2023-cü il tarixində Azərbaycan Dövlət Uşaq Filarmoniyası Beynəlxalq Qadınlar Gününə həsr olunmuş “Sizin üçün” adlı konsert proqramı ilə çıxış edib.

Zəngin musiqi nömrələri ilə seçilən konsert proqramında milli və müxtəlif xalqların mahnı və rəqsləri təqdim olunub, bəstəkar mahnıları səsləndirilib. Konsertdə Dövlət Uşaq Filarmoniyasının “Musiqili Uşaq Teatrı”, müxtəlif yaş qruplarından ibarət “Şəms” uşaq xoru, vokal sinfi, rəqs kollektivləri bir-birindən rəngarəng, maraqlı nömrələr ilə çıxış edib. “Musiqili Uşaq Teatrı”nın balaca qəhrəmanları öz səhnəcilərində nənələri, anaları bayram münasibətiylə təbrik etməyi də unutmayıblar. Həmçinin Vokal sinfi “Ana” mahnısı, “Şəms” uşaq xoru “Nənə”, “Ana” mahnıları, rəqs kollektivləri isə eyni məzmunlu rəqslərlə Beynəlxalq Qadınlar Gününü təbrik edib.

Hər zaman olduğu kimi bu dəfəki konsert proqramı da tamaşaçıların aramsız alqışları ilə sona çatıb.