https://innews.media/uploads/news/2022-03/_innews_7688a7be9d32ada29001f08c4_o.jpg
Prezident İlham Əliyevin 12 yanvar 2022-ci il tarixdə yerli televiziya kanallarına müsahibəsi zamanı açıqlamaları növbəti illərdə Azərbaycanda bərpa olunan enerji sektorunun geniş vüsətli inkişafının anonsunu verdi.
Müsahibədən 1 gün sonra 240 meqavat gücündə “Xızı-Abşeron” Külək Elektrik Stansiyasının təməlqoyma mərasimi keçirildi. Bu elektrik stansiyası 100 faiz xarici sərmayə hesabına inşa olunacaq. Sərmayəni yatıran və stansiyanı inşa edən şirkət Səudiyyə Ərəbistanının ACWA Power şirkətidir. 15 martda isə Prezident İlham Əliyevin iştirakı ilə daha bir böyük bərpa olunan enerji layihəsinin - Qaradağ Günəş Elektrik Stansiyasının təməli qoyuldu. 230 meqavat gücündə olan bu stansiyanın icraçısı və sərmayədarı bir çox ölkələrdə uğurlu layihələri ilə tanınan Birləşmiş Ərəb Əmirliklərinin Masdar şirkətidir.
“Xızı-Abşeron” Külək Elektrik Stansiyasının ardınca Qaradağ Günəş Elektrik Stansiyasının inşasına başlanması ondan xəbər verir ki, Azərbaycanda bütün bərpa olunan enerji növlərinin istehsalı inkişaf etdiriləcək. Çünki buna həm ölkənin iqlimi və təbii-coğrafi şəraiti imkan verir, həm də ölkədəki iqtisadi mühit münbitdir və siyasi iradə də var. Artıq gələcəkdə Xəzər dənizinin bərpa olunan enerji potensialının reallaşdırılması perspektivləri gündəmə gəlməkdədir. Belə ki, Xəzər dənizində yaşıl hidrogen yanacağının istehsalı ilə bağlı fikirlər səsləndirilir, müzakirələr aparılır.
Azərbaycanda növbəti onillik üçün sosial-iqtisadi inkişafın beş Milli Prioriteti müəyyən edilib. Həmin prioritetlərdən biri təmiz ətraf mühit və yaşıl artım ölkəsi adlanır. Bərpa olunan enerji mənbələrinin inkişafi təmiz ətraf mühit üçün zəruridir. Çünki dünyada atmosferə buraxılan, qlobal istiləşmə və iqlim dəyişikliyinə əsas səbəb kimi qiymətləndirilən karbon dioksid və ya istixana qazı tullantıları ənənəvi enerji növlərindən əmələ gəlir. Bu baxımdan bərpa olunan enerji mənbələri ətraf mühitin və ekologiyanın təmizliyinin qorunması üçün önəmlidir. Buna görə də artıq dünyada yaşıl artım və yaşıl iqtisadiyyat konsepsiyaları meydana gəlmişdir.
İstənilən ölkənin inkişafı və iqtisadi artımı üçün elektrik enerjisi zəruridir. Bu kontekstdə, bir tərəfdən iqtisadi artımı təmin etmək, digər tərəfdən isə ətraf mühiti qorumaq və qlobal istiləşmənin qarşısını almaq kimi bir-birinə ziddiyyət təşkil edən iki məqsədə nail olmaq problemi bəşəriyyət və elm adamları qarşısında dayanan böyük çağırışdır. Bu problemi həll etmək axtarışları yaşıl artım və ya yaşıl iqtisadiyyat kimi konsepsiyaların yaranması ilə nəticələnmişdir. Məhz bu yolla həm iqtisadi artıma və inkişafa nail olmaq, həm də ətraf mühiti qorumaq olar. Belə yanaşma isə həm də mədəniyyət məsələsidir, çünki insanların və cəmiyyətin davranış və yaşam tərzləri ilə, bəşəriyyətin gələcəyi ilə bağlıdır. Ona görə də bərpa olunan enerji mənbələrinin inkişaf etdirilməsi mütərəqqi dünyada bir ümumbəşər dəyər, mədəniyyət və kimlik göstəricisinə çevrilməkdədir. Yaşıl artım, yaşıl iqtisadiyyat kimi konsepsiyalara paralel surətdə yaşıl mədəniyyət fenomeni də formalaşmaqdadır.
Azərbaycan da mütərəqqi bir dövlət olaraq yaşıl artım ölkəsinə çevrilməyi növbəti onillikdə milli prioritet kimi müəyyənləşdirib və bu sahədə fəal işlər görür. Əminliklə demək olar ki, Azərbaycan yaşıl artım və bərpa olunan enerji mənbələrinin inkişafı meyarları baxımından da regionun lider dövlətidir.
Xarici sərmayədarların ölkəmizdə bərpa olunan enerji layihələrinə qoşulması Azərbaycanda investisiya mühitinin cəlbediciliyini göstərir. Eləcə də, belə layihələr Azərbaycanın Avropanın enerji təhlükəsizliyində iştirakı yollarını şaxələndirməyə imkan yaradacaq.
Hazırda Azərbaycan Avropaya neft və qaz ixrac etməklə enerji təhlükəsizliyinə töhfə verir. Gələcəkdə isə Azərbaycanın həm də bərpa olunan təmiz enerji mənbələri hesabına istehsal edilən elektrik enerjisini də Avropaya və digər ölkələrə ixrac edəcəyi gözləniləndir.
Ən son xəbərləri səhifəmizdən də izləyin
