https://innews.media/uploads/news/2025-05/_innews_6773e5c980e0d31e3cd3d9747_o.jpg
Alman Akademik Mübadilə Xidmətinin (DAAD) illik təqaüd mükafatlandırma mərasimi bu gün Bakının mərkəzində yerləşən Kapellhausda baş tutub. Tədbirdə Almaniya Federativ Respublikasının Azərbaycandakı səfir müavini cənab Heiko Schwarz və DAAD-ın Tiflisdəki regional nümayəndəliyinin rəhbəri cənab Gebhard Reul iştirakçılarla görüşdülər və onları salamladılar.
Bu il DAAD müxtəlif sahələr üzrə təhsil alan və elmi araşdırmalar aparan 33 azərbaycanlı tələbə və alimə Almaniyada təhsil və tədqiqat imkanları üçün təqaüdlər təqdim etdi. Təqaüdlər arasında iki illik magistratura proqramlarına ayrılmış 19 yer xüsusilə diqqət çəkib.
Tədbirdə çıxış edən natiqlər DAAD-ın fəaliyyətinin əhəmiyyətini, onun beynəlxalq akademik əməkdaşlığa verdiyi töhfəni və alman dili ilə mədəniyyətinin yayılmasındakı rolunu vurğuladılar. Qeyd olundu ki, 2025-ci il DAAD üçün xüsusi əhəmiyyət daşıyır — təşkilat bu il 100 illik yubileyini qeyd edir.
DAAD Azərbaycanda 1996-cı ildən fəaliyyət göstərir. Hazırda Azərbaycan Texniki Universitetində və Azərbaycan Dillər Universitetində DAAD lektoratlıqları fəaliyyət göstərir. 2021-ci ildən isə Tiflisdə Cənubi Qafqaz ölkələrinə cavabdeh olan regional ofis fəaliyyətə başlayıb.
Tədbir rəsmi hissə ilə yanaşı, alman və azərbaycanlı iştirakçılar arasında fikir mübadiləsi, təcrübə paylaşımı və şəbəkələşmə üçün geniş imkanlar yaratdı. Mərasim iştirakçıların alqışları və xoş təəssüratları ilə yadda qaldı.
