Azərbaycan millisinin futzalçısı Tofiq Mikayılov: "Yaxşı oynadıq, amma xalsız qaldıq"

Azərbaycan millisinin futzalçısı Tofiq Mikayılov: "Yaxşı oynadıq, amma xalsız qaldıq" Azərbaycan millisinin futzalçısı Tofiq Mikayılov: "Yaxşı oynadıq, amma xalsız qaldıq" https://innews.media/az/news/id-44116

AVRO-2026-nın əsas mərhələsinin qrup oyununda Yunanıstanla qarşılaşan Azərbaycan millisi sona 4 saniyə qalmış vurulan qolla məğlub olub. Afinada bütün göstəricilərdə rəqibini qabaqlayan komandamızın təcrübəli üzvü Tofiq Mikayılov innews.media matçı dəyərləndirib.

"Yaxşı hazırlaşmışdıq, qələbə qazanmaq istəyirdik. Düzdür, start yaxşı alınmadı, erkən qol buraxdıq. Ancaq sonra oyuna nəzarət tamamilə komandamızda idi. Hətta görüşün statistikasına baxsaq, rəqibin qapımıza 4 zərbə endirdiyini görərik. Bu göstərici hansı üstünlüyə sahib olduğumuza işarədir. Komanda olaraq yaxşı oynadıq, təəssüf ki, kobud səhvlər buraxdıq. Rəqib demək olar, hər səhvdən faydalandı. Biz isə çoxsaylı qol epizodlarını məntiqi sonluğa çatdıra bilmədik.

Tarixdə nəticə qalır, matç başa çatdıqdan sonra azarkeş tablodakı hesaba baxır. Üç xalı da həmin qələbə sayəsində aktivinə yazdırırsan. Yəni biri var, pis oynayıb uduzursan, bu qanunauyğunluqdur, insanı yandırmır. Biz isə yaxşı oynadıq, hətta bu komandaya qarşı Bakıdakı duellə müqayisədə üstün oyun nümayiş etdirdik. Təəssüf ki, cari mövsümdə keçirdiyimiz ən yaxşı oyunu xalsız yekunlaşdırdıq.

Qarşıda iki oyunumuz var, amma pley-offa yüksəlmək şansımız qalmayıb. İndi reytinq xalları toplamaq üçün mütləq qələbə qazanmalıyıq. Heyətimizdə gənclər var, bu cür oyunlarda "bişirlər"."

Qeyd edək ki, Azərbaycan millisi Yunanıstanla ilk qarşılaşmada Bakıda 2:2 hesablı heç-heçə etmişdi.