https://innews.media/uploads/news/2024-08/_innews_d7802b79a6af3678ea0fd9b24_o.jpg
Daşkənd və Səmərqənddə “Böyük əcdadların irsi - Üçüncü İntibahın təməli” VIII beynəlxalq konqresinin açılış mərasimi olub.
Konqresdə 35 ölkədən 300-ə yaxın alim, mütəxəssis və tədqiqatçı iştirak edib.
İştirakçılar arasında İslam tarixi, İncəsənət və Mədəniyyəti Beynəlxalq Tədqiqat Mərkəzinin (IRCICA), İslam Dünyası Təhsil, Elmi və Mədəniyyət Təşkilatı (İCESCO), Beynəlxalq Türk Mədəniyyəti (TÜRKSOY), AL-Furqan xeyriyyəçiliyi Vəqfi, Dünya Müsəlman Liqası və digər beynəlxalq təşkilatların nümayəndələri olub.
Açılış mərasiində Özbəkistan Respublikası Prezidentinin müşaviri Xayriddin Sultanov Özbəkistan Respublikasının Prezidenti Şavkat Mirziyoyevin “Böyük əcdadların mirası – Üçüncü İntibahın təməli” VIII beynəlxalq konqresinin iştirakçılarına təbrikini oxuyub.
Tədbirdə çıxış edən Beynəlxalq Türk Akademiyasının prezidenti akademik Şahin Mustafayev Orta Asiyanın zəngin tarixi və mədəniyyətini araşdırmağa həsr olunmuş konqresin elmi cəmiyyətin birləşdirilməsi üçün əsas platforma rolunu oynadığını vurğulayıb.
Türk xalqlarının mədəni irsinin qorunması və tədqiqi sahəsində beynəlxalq əməkdaşlığın zəruriliyini qeyd edən akademik Şahin Mustafayev Türk Akademiyasının fəaliyyəti çərçivəsində əməkdaşlığın daha da inkişaf etməsi üçün yeni təşəbbüslər təqdim edib.
Qeyd edək ki, konqresdə geniş elmi və mədəni proqram, o cümlədən plenar seanslar, seminarlar, sərgilər, turlar və "Şərq Taronaları" beynəlxalq musiqi festivalında iştirak da daxil olmaqla hərtərəfli elmi və mədəni proqram təqdim edilib. Bundan başqa, Səmərqənddəki Beynəlxalq Musiqi Festivalının açılışında, Özbəkistan Prezidenti Şavkat Mirziyoyev iştirak edib.
Özbəkistan Prezidentinin iştirak etdiyi tədbirdə akademik Şahin Mustafayev çıxış edərək konqresin elmi biliklərin dərinləşməsinə, qardaş xalqlar arasında mədəni əlaqələrin qurulmasına və türk mədəni irsini öyrənməyə həsr olunmuş müəssisələr arasında əməkdaşlığın gücləndirilməsinə zəmin yaradacağına əminliyini bildirib.
Həmçinin Şahin Mustafayevin rəsmi səfəri zamanı Beynəlxalq Türk Akademiyası və Özbəkistanda İslam Sivilizasiyası Mərkəzi arasında əməkdaşlıq memorandumu imzalanıb. Memorandum elmi məlumat mübadiləsi, kitabxanalar arasında əməkdaşlıq, birgə konfrans və seminarların təşkili, eləcə də müştərək elmi əsərlərin dərcini nəzərdə tutur.
Ən son xəbərləri səhifəmizdən də izləyin
