BDU-nun “Applied and Computational Mathematics” jurnalı “Web of Science” JIF Rank siyahısında 2-ci yerdə qərarlaşıb

“Clarivate Analitics” Beynəlxalq İnformasiya Agentliyinin hesabatına əsasən, Bakı Dövlət Universitetinin (BDU) “Web of Science” bazasında indekslənən “Applied and Computational Mathematics” jurnalının impakt faktoru 4.6, 5 illik orta impakt faktoru 3.0-dır.

Jurnal dünyada “Riyaziyyat, tətbiqi riyaziyyat” kateqoriyası üzrə Agentliyin JIF Rank siyahısında 331 beynəlxalq jurnal arasında 2-ci yerdə qərarlaşıb. Jurnal Avropa və MDB ölkələrində dərc olunan jurnalların JIF Rank siyahısında öz liderliyini qoruyur.

Qeyd edək ki, BDU-nun nəzdində Tətbiqi Riyaziyyat Elmi-Tədqiqat İnstitutunda nəşr olunan jurnal 2008-ci ildə “Science Citation Index Expanded” siyahısına daxil edilib.

Jurnalın redaksiya heyətinə dünyanın 20-yə yaxın ölkəsini təmsil edən tanınmış alimlər daxildir.

Jurnalın indiyədək nəşr olunmuş 62 nömrəsində dünyanın 50-dən çox ölkəsini təmsil edən müəlliflərin 600-dək məqaləsi dərc olunub. İldə dörd nömrəsi işıq üzü görən jurnalda müasir tətbiqi və hesablama riyaziyyatının aktual problemləri üzrə əldə olunmuş ən son elmi nəticələr dərc olunur.