https://innews.media/uploads/news/2026-06/_innews_893ca9fb1b02e21f699ec3ea7_o.jpg
Səyahət həvəskarlarının arzularını bəzəyən Maldiv adaları, Antarktida, Fransız Polineziyası və Qrenlandiya kimi istiqamətlər 2026-cı ilin ən bahalı turizm məkanları siyahısına başçılıq edir.
Euronews-un yaydığı məlumata görə, səyahət sığortası şirkəti SquareMouth tərəfindən hazırlanan yeni araşdırma dünyanın ən bahalı 15 turizm istiqamətini müəyyənləşdirib. Reytinq 100 mindən çox səyahət sığortası satışı, 6 mindən artıq turist arasında keçirilən sorğu və Google Flights, Kayak kimi platformaların məlumatları əsasında hazırlanıb.
Araşdırma göstərir ki, ən yüksək xərclər əsasən uzaq, əlçatımlılığı məhdud və premium xidmətlərin üstünlük təşkil etdiyi regionlarda qeydə alınır. Xüsusilə qütb ekspedisiyaları, ada istirahətləri və safari turları ən bahalı səyahət növləri hesab olunur.
Qrenlandiya liderdir
2026-cı ilin ən bahalı turizm istiqaməti Qrenlandiya olub. Burada turistin orta gündəlik xərci 1 171 dollar təşkil edir. Avtomobil kirayəsinin gündəlik qiyməti təxminən 110 dollar, sadə restoranda bir nəfərlik şam yeməyi isə 36 dollar civarındadır.
İkinci yerdə Britaniya Virgin adaları qərarlaşıb. Burada adi iş günündə hotel gecələməsinin orta qiyməti 1 137 dollar, gündəlik səyahət xərci isə 925 dollar səviyyəsində qiymətləndirilir.
Üçüncü pillədə yer alan Fransız Polineziyasında bir gecəlik hotel qiyməti 1 382 dollara, gündəlik istirahət xərci isə 756 dollara çatır.
Antarktida və Maldivlər ilk beşlikdə
Siyahının dördüncü sırasında Antarktida yer alır. Burada yalnız aviabilet xərci orta hesabla 1 899 dollar təşkil edir. Turistin gündəlik xərci isə 1 511 dollara qədər yüksəlir ki, bu da reytinqdə ən yüksək göstəricilərdən biridir.
Beşinci yerdə qərarlaşan Maldiv adalarında gündəlik istirahət xərci 1 072 dollar, hotel gecələməsi isə orta hesabla 1 249 dollardır.
Dünyanın ən bahalı 15 turizm istiqaməti
2026-cı il üçün hazırlanmış reytinqə aşağıdakı ölkə və regionlar daxil edilib:
Bahalı səyahətlər niyə daha da populyarlaşır?
Mütəxəssislər hesab edirlər ki, son illərdə turistlərin davranışında dəyişiklik müşahidə olunur. İnsanlar daha çox "bir dəfə yaşanacaq təcrübələrə" üstünlük verir, klassik çimərlik istirahətindən daha çox unikal və eksklüziv marşrutlara maraq göstərirlər. Bu səbəbdən Antarktida ekspedisiyaları, Şimal işıqlarını izləmək üçün qütb turları və uzaq ada istiqamətləri yüksək qiymətlərə baxmayaraq populyarlığını qoruyur.
Araşdırma göstərir ki, 2026-cı ildə lüks və macəra turizmi seqmenti qlobal turizm sənayesinin ən sürətlə böyüyən istiqamətlərindən biri olaraq qalır.
Ən son xəbərləri səhifəmizdən də izləyin
