https://innews.media/uploads/news/2026-06/_innews_ac124482829a6ac1bd0ec1d91_o.jpg
Bakıda Qazaxıstan və Azərbaycanın aparıcı tibb müəssisələrinin, turizm sənayesinin və hər iki ölkənin peşəkar ictimaiyyətinin nümayəndələri bir araya gətirən Astana şəhərinin tibbi turizm üzrə beynəlxalq roud-şou tədbiri keçirilib.
Tədbir “Astana Tourism” Turizmin İnkişafı Mərkəzi tərəfindən Qazaxıstan Respublikasının Azərbaycan Respublikasındakı Səfirliyinin və Azərbaycan Tibbi və Termal Turizmə Dəstək Assosiasiyasının dəstəyi ilə təşkil olunub.
Qazaxıstan Respublikasının Azərbaycandakı Səfiri Alim Bayel, roud-şounun Qazaxıstan və Azərbaycan arasında səhiyyə və tibbi turizm sahəsində əməkdaşlığın möhkəmləndirilməsi üçün mühüm platformaya çevrildiyini bildirib. Tədbirin əsas məqsədi Qazaxıstan paytaxtının müasir tibbi xidmətlərini beynəlxalq bazarda tanıtmaq, iki ölkənin klinikaları və turizm şirkətləri arasında tərəfdaşlıq əlaqələrini inkişaf etdirmək, həmçinin xarici pasiyentləri müalicə üçün Astanaya cəlb etmək olub.
Tədbir çərçivəsində Qazaxıstan paytaxtının aparıcı tibb müəssisələri öz nailiyyətlərini təqdim edib, diaqnostika və müalicənin qabaqcıl metodları barədə məlumat verib, həmçinin Astana təbabətinin hazırda malik olduğu yüksək texnologiyalı həlləri nümayiş etdiriblər.
Bu gün Astana Mərkəzi Asiyanın aparıcı tibbi turizm mərkəzlərindən biri statusunu inamla möhkəmləndirir. Şəhərdə Joint Commission International (JCI) beynəlxalq standartları üzrə akkreditasiyadan keçmiş 9 tibb müəssisəsi fəaliyyət göstərir ki, bu da göstərilən tibbi xidmətlərin yüksək keyfiyyətini və təhlükəsizliyini təsdiqləyir.
İştirakçılar arasında neyrocərrahiyyə, onkoloji xəstəliklərin müalicəsi, uşaq reabilitasiyası, reproduktiv tibb və estetik cərrahiyyə istiqamətləri xüsusi maraq doğurub – məhz bu sahələr hazırda azərbaycanlı pasiyentlər arasında ən çox tələb olunan istiqamətlərdən hesab olunur.
Astana şəhərinin nümayəndə heyətinin tərkibinə Uşaq Reabilitasiyası Milli Mərkəzinin, Neyrocərrahiyyə Milli Mərkəzinin, Milli Elmi Onkologiya Mərkəzinin, Ecomed Reproduktiv Tibb Klinikasının və Tulip Medicine Plastik Cərrahiyyə Klinikasının nümayəndələri daxil olublar və onlar öz imkanlarını təqdim edib və azərbaycanlı həmkarları ilə birgə əməkdaşlığın perspektivlərini müzakirə ediblər.
Roud-şou proqramına Astananın tibb müəssisələrinin təqdimatları, iki ölkənin tibb ictimaiyyətinin nümayəndələri arasında B2B görüşlər silsiləsi, həmçinin tibbi turizm sahəsində tərəfdaşlıq münasibətlərinin daha da inkişaf etdirilməsinə yönəlmiş əməkdaşlıq memorandumlarının imzalanması daxil olub.
Tədbirin davamı olaraq iyunun 17-də Bakı sakinləri üçün Citomed klinikasının bazasında ödənişsiz ilkin konsultasiyalar təşkil edilib. Astanadan gələn aparıcı mütəxəssislər pasiyentləri qəbul edərək diaqnostika və müalicə məsələləri üzrə peşəkar rəy almaq imkanı yaradıblar.
Bakıda beynəlxalq roud-şou tədbirinin keçirilməsi Astana şəhərinin tibbi turizminin inkişafı strategiyasının həyata keçirilməsi və Qazaxıstan paytaxtının keyfiyyətli, yüksək texnologiyalı tibbi yardımın beynəlxalq mərkəzi kimi təşviqi istiqamətində növbəti addım olub. Bu cür təşəbbüslərin inkişafı Qazaxıstan və Azərbaycan arasında əməkdaşlıq üçün yeni imkanlar açır və region sakinlərinin dünya səviyyəli müasir tibbi texnologiyalara çıxışının genişlənməsinə töhfə verir.
Ən son xəbərləri səhifəmizdən də izləyin
