Dr.İsmayıl Əfəndiyev Ümumdünya Səhiyyə Təşkilatının dərc etdiyi təlimatın həmtərtibçisi olub

Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent, toksikoloq İsmayıl Əfəndiyev Ümumdünya Səhiyyə Təşkilatının “Toksikoloji mərkəzlər zəhərlənmələrin qarşısının alınması və kimyəvi maddələrin təhlükəsiz idarə edilməsi üçün vacib vahid kimi” adlı təlimatının həmtərtibçisi olub.

Zəhərlənmələr qlobal ictimai səhiyyənin aktual problemidir. Toksikoloji mərkəzlər Beynəlxalq Səhiyyə Qaydalarının həyata keçirilməsində mühüm rol oynayır. Nəşr olunmuş ÜST vəsaiti toksikoloji mərkəzlərin kimyəvi maddələrin törətdiyi xəstəliklərin qarşısının alınması üzrə potensialının artırılmasına, yeni növ ksenobiotiklər barəsində məlumat bazalarının yaradılmasına, göstərilən xidmətlərin təkmilləşdirilməsinə, laborator imkanların genişləndirilməsinə və kliniki toksikologiyanın digər aktual məsələlərinə həsr olunub. Təlimat ÜST-nin rəsmi saytında dərc olunub.